من يومين .. إشتريت كتاب مشوق لتاني مره أشتريه بعد ما
أشتريته من سنتين و لإهمالي الشديد ضاع مني .. الكتاب إسمه ( الإقتصاد عارياً Naked Economy ) للكاتب الأمريكي "
تشارلز ويلان " . و الكتاب ببساطة يُعتبر مقدمة سهلة و بسيطه و مبسطه لعلم
الإقتصاد للمواطن العادي الذي لم يدرس أو درس الإقتصاد و لم يعطيه أي إهتمام و قال
: " سبحان ما تخلص المادة دي !! " .. و بعد ما خلصت رمي الكتب و
الكراريس. الكتاب لغته بسيطه جداً و يشرح مفاهيم الإقتصاد عن طريق قصص واقعية و
عملية .. و من قرائتي للكتاب ؛ إكتشفت قد إيه العلم ده مشوق جداً عندما تشرحه بهذه الطريقة !
سبحان الله ! .. دائماً ما كنت
" أستغلس " مادة الإقتصاد في مرحلة الثانوية العامه .. و في مرحلة
الجامعة كنت لا اطيق مادة " الإقتصاد الهندسي " التي درسها لي أ.د. حمدي
معوض شافعي – ربنا يديله الصحه لو كان عايش و يرحمه إذا كان
توفى.
كنت دائماً ما أشعر أن هذا
العلم هو علم جامد ليس به أي نوع من الإثارة أو ( الأكشن ) ، فهو ليس علم حركي
كالديناميكا أو يتطلب تفكير كبرمجة جهاز PLC في معامل سيمينز .. أو حتى به إثارة مواد
الكيمياء .. كنت أرى أنه علم الأرقام و الإحصاءات و الرسوم البيانية و تطبيق
القوانين و المصطلحات ( المكلكعه ) فقط لا غير.
لكن وجدت من خلال الكتاب إن
طريقة شرحك لأي شيء في الدنيا هي اللي ممكن تخليك تحب الموضوع أو تنفر منه .. و
كمان طريقة القصص الواقعية اللي بتدخلها في الموضوع بتحببك أكتر في المجال و
بتخليه ملموس بالنسبه لك .. و هاقولك مثال من الكتاب :
" و أستعير هنا قول جون
برنارد شو : ( إن الإقتصاد هو فن الإستفادة القصوى من الحياة. ) ، فعلم الإقتصاد
هو دراسة كيفية تحقيق ذلك ، فالأشياء القيمه وجودها محدود مثل : النفط ، لبن جوز
الهند ، الأجسام المثالية ، الماء النظيف ، الأشخاص الذين يصلحون ماكينات التصوير
المعطله ... إلخ. فكيف إذاً نوزع تلك الأشياء ؟
لماذا يمتلك بيل جيتس Bill Gates طائرة خاصة و لا تمتلك أنت واحدة ؟ قد تكون
إجابتك : ( لإنه غني ! ) ولكن لماذا هو غني ؟ .. ببساطه لأنه يتمتع بموارد العالم
المحدودة أكثر من أي شخص أخر !! ......... "
" أحد أهم ملامح إقتصاد
السوق هو أنه يوجه موارده لأكثر الإستخدامات نفعاً ، فمثلاً لماذا لا يعمل توم
كروز Tom Cruz في مجال
التامين على السيارات ؟ لأن ذلك سيصبح إهداراً لمواهبه الفريده. فهو بالفعل ردل ذو
شخصية قوية و قد يبيع بوليصات تأمين أكثر من أي رجل مبيعات عادي ، و لكنه من
القلائل في العالم الذين يستطيعون إنجاح فيلم سينمائي. أي أن ملايين الناس حول
العالم سيذهبون لمشاهدة فيلم في السينما لمجرد أن توم كروز بطلاً به. لذا فشركات الإنتاج السينمائي مستعده أن تدفع
عن طيب خاطر 20 مليون دولار في الفيلم
الواحد لتوم كروز لكي يقوم بدور البطولة . و وكالات التأمين أيضاً مستعده أن تدفع
لقاء جاذبية كروز للعملاء و لكنه قد تدفع نحو 20 ألف دولار، لذا من المنطقي جداً
أن يعمل توم كروز لدى من يدفع له أكثر. و سيحصل على المزيد من المالي في هوليود
لأنه المكان الذي يستطيع أن يزايد فيه على أجره. أي أنه المكان الذي يحقق له
إقتصادياً أقصى منفعه. "
إقتبست من الكتاب جزء يوضح ربط
المسائل الإقتصادية بالواقع و التجارب .. و أتحداك إن لم تكن قد فهمت و علق في
ذهنك الآن كيف حصل بيل جيتس على ثروته من خلال مبدأ إقتصادي و هو ( إمتلاكك للنادر
يعني ثروة ! ) .. و أنك تعرف الأن ما هو " إقتصاد السوق الموجه للمنفعه
" من قصة توم كروز.
هل سألت نفسك : " ليه انا
هافتكر اللي كتبه أحمد من شوية و هيعلق في دماغي فتره من الزمن ليست بالقليله ؟
" ... إسمحلي أجاوبك : لأنك فهمت
الموضوع عن طريق حاجه إسمها ( المؤثرات البصرية في العقل الباطن ) .. حاسس إن
الكلام ده كبير ؟؟ .. ده فن إسمه في ال غرب ( فيجوالتي Visualty ) .. و
ده عبارة عن إدراكك للمعلومه من خلال الرسومات ، سواء كانت رسومات ملموسه و تقدر
تشوفها .. أو حاجات تقدر تتخيلها في عقلك .
يعني مثلاً قصة توم كروز .. إنت
ممكن تكون تخيلت و إنت بتقرأ توم كروز و هو وسيم و لابس بدلة محترمه و ماسك شنطه
في إيده كمندوب مبيعات و كمان بيبتسم .. فتثبت المعلومه في ذهنك بالتخيل .. شوفت
الموضوع بسيط إزاي !!
أما عن الفيجوالتي المرئي ..
فخلينا نشوف مع بعض الفيديو ده و هو مدته حوالي 10 دقائق .. إنت ممكن تحس إن المدة
كبيرة .. لكن عاوزك بعد ما تشوف الفيديو تفكر في كم المعلومات اللي اتعرضت قدامك و
إنت فاكر منها قد إيه بعد مشاهدة الفيديو .. أسيبكم مع الفيديو شوية ..
زي ما شوفتوا ، الفيديو بيتكلم
عن تعريف حقوق الإنسان و تاريخ نشاة وثيقة حقوق الإنسان .. اللي إنتوا شوفتوه ده
إسمه ( فيجوالتي متحرك أو دينامك ) و ده
عبارة عن رسومات في عرض فيديو شيق لتوصيل المعلومه. و اعتقد إنك فهمت .. و
المعلومه وصلت ..
فيه نوع تاني مهم من طريقة الفيجوالتي لتوصيل المعلومه .. و إسمها (
إنفو جرافيك Infographic ) .. و
الإنفوجرافيك عبارة عن رسومات بيانية معروضه بطريقه ممتعه لتثبيت المعلومه أو حتى
لمجرد الشرح .. و الصوره دي مثال أنا قمت بترجمته للعربية و نشرته من فتره على
تويتر و فيسبوك.
أنا ليه بأشرح كل الكلام اللي
فات ده ؟ .. و ليه مهتم ؟؟
تعالى تخيل معايا .. لو التعليم
في مصر و بلادنا العربية بقا بالطريقة دي ( فيجوالتي ) !! .. تخيل كم المواد اللي
هيحبها الطلبه .. و كم المعلومات الشيقه اللي هيكتسبها الطلبه من غير كلل أو ملل
من طريقة الشرح .. تخيل كم الطاقة الإيجابية اللي ممكن تنشرها بين الطلاب و بين
الناس عامة لما تستخدم طريقة الـ ( فيجوالتي ) في التدريس من ناس متخصصه في المجال
ده ..
يا ترى ممكن ده يتحقق ؟؟ ..
أتمنى ذلك ..
أحمد البنّا | القاهرة | 11 يناير 2013
ليست هناك تعليقات:
إرسال تعليق
ممكن تقول رأيك في المكتوب هنا .. شرفتنا :)