على شاشة السينما جري الكلام بالطول
و صحيت على صوت :الفيلم خلص … معقول ؟؟
يكونش أنا بأحلم ؟ …. أو جايز أنا مسطول ؟
و الناس دي بتجري ليه ؟ … و تنط ع العتبات
يا مكيفين الهوا … العقل فعلاً مات
أنا نمت في السينما … و صحيت على التيترات
من يوم ما أنا روحتها … و قلبي طار بيها
بحب تكييفها … بموت في كراسيها
و خلاص بقت دنيتي … هاعيش و أموت فيها
بلاطها ده جنتي … و حيطانها دي نخلات
يا مكيفين الهوا … العقل فعلاً مات
أنا نمت في السينما … و صحيت على التيترات
ساعة ما نورها انطفى … النوم غطى عيوني
و لما نمت أنا … يا ناس ليه بتلوموني
ما الضلمه عملت Cover … على نرمين و طوني
و السينما كلها شكت … من صوت على و زينات
يا مكيفين الهوا … العقل فعلاً مات
أنا نمت في السينما … و صحيت على التيترات
ليست هناك تعليقات:
إرسال تعليق
ممكن تقول رأيك في المكتوب هنا .. شرفتنا :)